تولدت في الدنيا نحلم
أحلام بين السما و الغيوم
أحلام بين القمرة و النجوم
تولدت في الدنيا نحلم
نحلم بضحكة تزهينا
ضحكة تخلي الدنيا بنينا
تولدت في الدنيا نحلم
نحلم بجرانة الموزيكا
جرانة تزهي الروح اللي فينا
تولدت في الدنيا نحلم
نحلم بتاريخ بلادنا
التاريخ اللي كتبوه جدادنا
و اللي بسيف عيشوه لولادنا
فقت مالحلمة
نلقا روحي في كابوس الدنيا
سمعت على أحلامي كان دعا الشر
لقيت الضحكة توسم الخطر
لقيت الموزيكا كي ضرب الطبل
و لقيت تاريخنا مقطوع على حاضرنا
لقيت الموت موجود في كل ثنية
و الأصفار تكتبت بكل بلية
هي تسكت و أنا نشرع البدعية
ما حبيت الدنيا
لا ...
رجعني لحلمتي
غمضت عينيا و ضلمت لي داير بيا
إيجا يا نوم... و رجعني لحلمتي
ما حبيت الواقع و واقع الواقع
رجعني لحلمتي
رجعني نبني من الورق قصور
رجعني نبني و نعلى و ما نخمم في اللي ما نجمو
رجعني لحلمتي راني تخنقت و الدنيا دارت بيا
نحب نعيش دنيا أخرى
دنيا نتخيلها و ما نقلق منها
دنيا ما فيهاش حدود
دنيا ما فيهاش حرام و مندوب
أي نعم دنيا لا فيها لا دين لا ملة
دنيا نعيشوا فيها أنا وياك صحاب
و ماتفرقناش ملصقات
كحلوش و إلا لابس برنوس
أنت أنا و أنا أنت
هذي دنيتي
سامحوني هاذي حلمتي
هاذا خيالي هاذي ورقتي و قلمي
هذا كلام لا يمت بالواقع بحتا صلة
لكن نحلم و ديما نقعد نحلم
لين كابوس الواقع يولي حلمتي المكتوبة بخط يدي
