تقوم ببرشا وجيعة ، دمعة عل الخد و بقلب يدق و ما تعرفش روحك إنت في صباح ولا في نفس الليلة ، تجبد نفس عميق, نفس كلو تعب و قهرة شهيق داخل نظيف خارج بغصة و شظايا روح مهدومة او بالاحرى بقايا روح كلاها حبها ليك , ما عادشْ تفرق السوايع الكل خوات و صوابع ليدين خوات وحدها العين غلّطتنا ، تتفكر المنسي و تنسى اللي إنت لازمك تنسى ..
التنفيسة تولي أصعب مالولادة ما تخرج إلاَ ما روحكْ تخرج معاها ، و كلام آخر ليالي مزال واحل غصة في الڤرجومة و حس بلا حس .. كفر ، برشا كفر و .."الدنيا تبدل برشا حاجات ومنعرفش علاش " آخر كلمة تقالت قبل ما يخليك وحدك و هو ناسي أصل البلا منين ؟ و شكون اللّي شقك نصفين و خلاك ضايعة بين ثنين..
يقولو الحقيقة توجع أنا نقلّكم اللّي الكذبة توجع أكثر ، توجع الحجر خلي عبد من لحم و دم .. لومو سكاكن و عصي و برشا وجيعة و حسابو غلط في غلط , والغلط كالملح عالجرح . زعمة شكون اليهودي فينا؟ علاش خليتني بقهرتي و همي علاش خليتني الدمعة تحرق على خدي تسري علاش إيجا و خليني نصور حبي ليك بالمقلوب ولتالي مايل, نبني فيه من عشقي ديار و ظلايل , إيجا و حطني في حجرك و أحكيلي شعملتْ في صغرك عمايل , عومتك في البحر في عز الشّتا ؛ و لعبك بالزربوط في القوايل
..
إيجاني خلي نهرم و نشيب معاك و نوليلك عكاز كبرك وين تحتاجني نسندك , و لا نقلك ؟ هيا نعيشو عكس المنقالة نوخرو بالعمر سنين و نرجعك لصغرك , إيجا و رجعني هاك الملايكه اللّي فيسع ما جبينها يندى بالحشمه كيف تاكلها بغزرتك , من حنانك شبعني و على صدرك كبّرني لين يخطفني منك رقاد قبري ..
إيجا حبّني و نحبّك إيجاني و بروحي نودّك إيجاني خلي نحس بأنفاسك و هي تقتل في البرد اللي عشش فيا بالك مالوحشة اللّي هاده العظام نبرى ... و لا نقلك عنقني خلي نتولد منك من جديد , رجعنا واحد مش ثنين خلي نحسْ بدمك يهرهر في عروقي و بحرارتو ندفى , إيجا و طفّيلي لهليبة عطش وحشتي ليك , إيجا وعظمة الرب نار جهنم أرحملي مالوحشه اللي ملات وسطي الثنايا .. إيجا إجبد من رواريا هواهم السخون اللي معبيهم و من جواجي جواجي تنفس , أسكن فيا و نخبيك بين الأشفار اللي فيك تقدس..توحشتك و توحشت غزرتك ليا كلامك و نصايحك لي محفورين في جواجي كلمة " نموت عليك" على الجبين ندات ليها مديدة توحشتك...
كي نضعف و تضيق بيا الدنيا تقلي كون قوية كون غابة مليانة شجار كل ما تذبل عاود انبت و اكبر توحشتك نقلك مغمومة و مخنوقة تقلي هاكا قلبك كثر عليه التعب يزي مركبتها لروحك ايجا قبل ما تمشي لبلاد الغربة خليني نعبي من ريحتك الرواري ايجا نعنقك و نزيد نتليع بحلاوة تعنيقتك ايجا نبوسك نمسك نلعبلك بخدودك ايجا نحبك و نحلف على نسيانك باليمين ايجا المكتوب غدار و الدنيا اغدر الله أعلم مازالت نراك ولا لا ايجا ماتمشيش وأنا بغصتي و وجيعة روحي علاه تحبني لعشرتنا نسايه و هي وحشتك و غيبتك عليا شهواطةإيجا و لاّ نقلّك ؟ إيجا نعاودو ملّول .. خلّي هالكلام في أبيار القلب مدفون و عليه مسكّر و مقفول ... إيجا و لا تحبّني و لا نحبّكْ إيجا و أنا مالباب نردّكما تجيش و كان تجي نصدّك ..
كي نضعف و تضيق بيا الدنيا تقلي كون قوية كون غابة مليانة شجار كل ما تذبل عاود انبت و اكبر توحشتك نقلك مغمومة و مخنوقة تقلي هاكا قلبك كثر عليه التعب يزي مركبتها لروحك ايجا قبل ما تمشي لبلاد الغربة خليني نعبي من ريحتك الرواري ايجا نعنقك و نزيد نتليع بحلاوة تعنيقتك ايجا نبوسك نمسك نلعبلك بخدودك ايجا نحبك و نحلف على نسيانك باليمين ايجا المكتوب غدار و الدنيا اغدر الله أعلم مازالت نراك ولا لا ايجا ماتمشيش وأنا بغصتي و وجيعة روحي علاه تحبني لعشرتنا نسايه و هي وحشتك و غيبتك عليا شهواطةإيجا و لاّ نقلّك ؟ إيجا نعاودو ملّول .. خلّي هالكلام في أبيار القلب مدفون و عليه مسكّر و مقفول ... إيجا و لا تحبّني و لا نحبّكْ إيجا و أنا مالباب نردّكما تجيش و كان تجي نصدّك ..
إيجا و لاّ نقلّك ؟ ما تجيش ..
سارة غبري